Fullvinnsla

Í minningunni þá held ég að æðsta takmark hvers útgerðarmanns hafi verið að græða strax sem mest en þeir sem unnu við útgerðina héldu að sameiginlegt markmið útgerðarmannsins og þeirra sjálfra væri það sama. Takmarkið var sameiginlegt að því leyti að græða sem mest, en hin vinnandi stétt hamraði einatt á því að fullvinna aflann til þess að sjávarfangið skilaði sem mestum gróða. Þetta var sjálfsagt rétt en í dag er þetta ekki lengur til umræðu. Ég sakna eilítið þeirra sem héldu þessu með fullvinnsluna á afla fram árum og áratugum saman og held að ef Íslendingar útvíkkuðu þessa hugsun gætu við orðið einhverjir mestu vopnaframleiðendur í Evrópu. Öll sú álframleiðsla sem við tökum þátt í skilar þjóðinni ekki nema broti af því sem vopnaframleiðsla gæti fært þjóðarbúinu. Að græða á því að selja rafmagn er ótrúlega barnalegt þegar aðalgróðinn liggur í því að selja vopn. Efnið sem notað er í skammdrægar eldflaugar, svo tekið sé dæmi, er að mestu ál þannig að ef vopnaverksmiðja risi á lóðinni við hliðina á Reyðaráli væri kostnaður við efnisflutning algjörlega í lágmarki og þannig væri hægt að bjóða upp á hagstætt verð á þessum markaði. Hægt væri að komast að samkomulagi við álverið þannig að eldflaugahólkarnir væru einfaldlega steyptir í kerskála álversins, fluttir á járnbraut yfir í vopnaverksmiðjuna þar sem kramið væri sett í og mögulega væri hægt að nýta skipin sem koma með súrálið hingað til að flytja hátæknivopn til baka. Það er ekkert vit í því hámarka ekki gróðann sem álframleiðsla bíður upp á. Tískusveiflur á vopnamarkaðinum er einnig langtum minni en þekkist á öðrum sviðum, góð sprengja er jú klassísk.

Það kann að hljóma kaldhæðnislega að bjóða upp á vistvæna sprengju, þeas sem brennir metangasi en Íslendingar gætu þarna haft not fyrir það metan sem verður til hérna. Umhverfisvernd hefur ekki enn knúið dyra hjá vopnaframleiðendum en sprengja sem er úr áli sem framleitt er á umhverfisvænan hátt, knúin af metangasi sem mengar tiltölulega lítið, lökkuð að utan með vatnsþynnanlegu lakki, hlyti að teljast spennandi kostur fyrir t.d. Bandaríkjamenn sem áforma að setja upp skammdrægar eldflaugar í Evrópu sem beinast gegn Rússum. Við höfum allt sem þarf í þennan bisness, dugnaðinn, áhugann, færnina, fjármagnið, siðgæðið og seigluna. Við erum Íslendingar afkomendur víkinga.

Hneyksli

Íslenskar teprur, blindingjar og sjálfskipaðir siðferðispostular kætast þegar fréttamenn sýna vændiskonu reyna að komast hjá viðtali. Já, auðvitað skammast hún sín fyrir að stunda þetta, hugsar þessi smáborgaralegi hópur, annars yrði hún við ósk fréttamannsins um viðtal. Látum lögguna í þetta. Þetta er ekki ólöglegt en ferlega ósiðlegt, að okkar mati í það minnsta. Notum þá aðferð sem Íslendingar hafa löngum beitt og nota enn, látum lögguna og lögmenn eyðileggja fyrir einhverjum starfsemina. Það samrýmist ekki siðferðisgildum smáborgarans að einhver skuli hafa aðrar skoðanir og búi í næsta nágrenni við hann. Hvers konar frétt er að heimsækja vændiskonu á hótel undir fölsku flaggi og ætla svo að spyrja út í einhver smáatriði í hennar starfsemi? Kannski hefði fréttamanni verið meira ágengt hefði hann komið hreint fram og lygalaust, hefði hann viljað búa til sannfærandi frétt. Nei, það sem fyrir fréttafíflinu vakti var að búa til æsifrétt upp á gamla móðinn.
Vændiskonan hafði heimasíðu sem fram kom allt það sem hún hafði huga á að gera og einnig hvaða verð hún setti upp. Er það virkilega refsivert að stunda kynlíf og borga fyrir. Líklega má heimfæra það upp á alla þá sem stunda kynlíf að þeir borgi fyrir það kynlíf sem þeir stunda, giftir jafnt sem ógiftir.